Rimbomb dal proget da teater "La firma"
Ideja
Illas lecziuns da lingua vains nus adüna darcho gieu fasas integredas cul TCT (teater centro al tema). In quistas occasiuns ho que do adüna darcho scenas fich divertentas, ün pêr da quellas ho nossa magistra duonn’Elvira integro i’l teater La firma. Duonn’Elvira ho scrit las rollas adatteas per minchün/a da nus 10 scolars e scolaras. Ün da mieus conscolars es sto respunsabel per la glüsch e la tecnica. Sar Flurin, nos magister d’inglais e magister da la 1a e 2a classa, ho accumpagno tuot il teater cun differents töchs cul clavazin. Duos cuaffösas haun transmüdo a nus scolars e scolaras i’ls persunagis da l’istorgia.
La firma vain regneda d’ün vegl nar tiran. L’ideja da quist vegl meznar vains gieu nus scolars e scolaras. Quist’ideja am paraiva fich buna. Tuot las otras idejas d’eiran eir bunas. Eir cha que as tratta d’üna firma da dets magics, m’ho plaschieu fich bain.
Preparaziun ed imprender text
Eau d’he gieu la rolla da Riccardo Ravaschia, il figl dal vair inventur dals dets magics. Que d’eira üna granda rolla cun bod 1500 pleds. Eau d’he imprains mieu text düraunt fich bgeras uras. Zieva las vacanzas da meg vainsa alura exercito eir sül palc. Il text vainsa survgnieu aunz las vacanzas da meg, per pudair cumanzer ad imprender quel già düraunt las vacanzas. Eir in giuvand las scenas d’he eau pudieu memoriser il text.
Rapreschantaziuns
Il prüm di, la gövgia, ils 22 gün 2017, sun eau sto il prüm magari gniervus, ma zieva duos minuts ch’eau d’eira sül palc scu Riccardo, nu d’heja bado pü ünguotta da l’agitaziun. In venderdi es gnida üna firma specialiseda a filmer nos teater, lo d’eiran divers da nus bgerun pü agitos. La sanda nu vainsa fat quasi üngüns sbagls. Il public es sto inchanto da nossas rapreschantaziuns e que ho do duos sairas üna standing ovation. Que d’eira s’inclegia üna granda motivaziun per nus tuots.
Recapitulaziun
A me ho quist proget plaschieu fich bain, tuot las prouvas sül palc, güder düraunt la posa tar la cassa, tar las tuortas e tar las bavarandas, fer bellet e frisuras, müder vstieus, giuver sül palc. A me pera que pcho cha’d es a fin. Eau fess quist teater fich gugent aunch’üna vouta.
Flurin Bott, 6evla classa